拍拖梗係想甜甜蜜蜜，彼此都能夠真心付出，先可以令到個關係長久。但永遠都唔會好似童話故事咁順利，有時好似再努力都徙勞無功，又或者係對方根本唔會欣賞你嘅付出，就好似鄧麗欣同小方個首好心好報咁... 「落力為你好得不到分數」。不如大家一齊睇下外國網站Insider 所盤點嘅5大拍錯拖特徵喇。

#成日話好忙

拍拖熱戀恨不得天天同對方見面，無論幾忙都好都會抽時間見下對方，最多咪落返旺角搭通宵小巴返屋企！但如果你嘅另一半好少同你約見面，甚至一個月先見得兩、三次，或者連電話、Message 都好少，咁可能「忙」只係一個藉口，就可能係遇到錯的人啦...

#嫌三嫌四

如果對方不斷對你雞蛋裡挑骨頭，成日數落你唔好嘅地方，要你變成佢地口中最理想人，真愛對方並唔會咁做，講就好聽，但實質就成日嫌三嫌四！

#當你嘅說話係耳邊風

有無遇過一種人，只係有佢講，無你講？有種伴侶總係會係自己遇到難題嘅時候向你呻，要你即刻俾意見對方。但當你有問題個陣，就表現到唔在意，仲會好快轉移話題添！

#妒嫉你過得好過佢

如果係真心愛對方，見到另一半成功當然會鄧佢開心啦。但當你係生活上過得順利嘅時候，分享比另一半知，佢無為你高興之餘仲要妒忌嘅話，除咗唔大方之外仲好肉酸添！呢種伴侶亦好難再同佢分享任何喜悅。

#從來唔認錯

有種人永遠都覺得自己岩曬，覺得道理係自己個邊，就算錯到離曬大譜，都依然死雞撐飯蓋。唔單止唔會認錯，連氹下你都唔會，呢種人係身邊真係好激心架。